John Griffiths yn croesawu Adolygiad Webb o Addysg Bellach

Nodwyd yr angen am adolygiad yn Y Wlad Sy’n Dysgu: Gweledigaeth ar Waith, ac fe’i comisiynwyd i ystyried y ddarpariaeth AB ôl-14 yng Nghymru a sut y gellir ei datblygu mewn ffordd well yn y dyfodol.

Roedd yr adolygiad nid yn unig yn dadansoddi Sefydliadau AB, ond hefyd yn ystyried datblygiadau ym maes addysg 14-19; yr ymateb i anghenion cyflogwyr a’r economi o ran sgiliau; dysgu ymhlith oedolion, cyfiawnder cymdeithasol ac ymgysylltiad â’r gymuned.

Mae’r adolygiad wedi’i gynnal gan banel annibynnol o dri arbenigwr gan ddefnyddio cymorth pellach grŵp cyfeirio ehangach sydd ag arbenigedd mewn ysgolion, AB, cyflogaeth, sgiliau ac addysg uwch. Cadeiriwyd y panel adolygu gan Syr Adrian Webb, a Sheila Drury OBS a Gary Griffiths oedd y lleill.

Bwriedir i waith yr Adolygiad gysylltu â’r Strategaeth Sgiliau a Chyflogaeth arfaethedig a gyhoeddir ar gyfer ymgynghoriad ym mis Ionawr 2008.

Dywedodd John Griffiths:

Rwy eisiau sicrhau bod darpariaeth addysgol Cymru yn diwallu anghenion ei phobl a’i heconomi nawr ac yn y dyfodol. Mae hyn yn ganolog i amcanion Llywodraeth Cynulliad Cymru ac mae’n un o ymrwymiadau sylweddol Cymru’n Un.

Hoffwn ddiolch i Syr Adrian Webb ac aelodau eraill y panel am eu gwaith yn cynnal yr Adolygiad ac rwy’n edrych ymlaen at ystyried eu casgliadau ac at weld lle y gallwn weithredu arnynt yn ymarferol.

Nodiadau

Aelodau’r Panel

Syr Adrian Webb (Cadeirydd)

Yr Athro Syr Adrian Webb yw Cadeirydd Ymddiriedolaeth GIG Pontypridd a Rhondda ac mae’n aelod anweithredol o Fwrdd Gweithredol Llywodraeth Cynulliad Cymru. Bu’n Is-Ganghellor Prifysgol Morgannwg nes Rhagfyr 2005. Cyn hynny bu’n ddarlithydd yn Ysgol Economeg Llundain ac yn Athro Polisi Cymdeithasol ym Mhrifysgol Loughborough. Arweiniodd ei yrfa academaidd at lawer o brosiectau ymchwil, cyhoeddiadau a gwasanaethau ymgynghori. Bu ganddo lawer o rolau pwyllgora a chynghori yn Whitehall ac yng Nghymru, gan gynnwys Panel Cynhyrchiant Gwasanaethau Cyhoeddus Trysorlys EM, ac mae wedi cadeirio sawl ymchwiliad cenedlaethol. Bu’n rhan o waith Adolygiad Beecham. Tyfodd i fyny yn Ne Cymru ac mae’n byw yno ar hyn o bryd.

Sheila Drury CBE

Mae Sheila Drury wedi cael gyrfa hir ac unigryw yn cwmpasu addysg, hyfforddiant a busnes, gan weithio yn yn y sectorau cyhoeddus, gwirfoddol a phreifat, ac ar hyn o bryd mae’n aelod o Grŵp Cynghori Gweinidog Llywodraeth y Cynulliad dros Addysg, Dysgu Gydol Oes a Sgiliau. Mae ei phrofiad a’i harbenigedd yn cynnwys cynnal grŵp o gwmnïau electroneg, gan weithio yn rheng flaen busnes di-lol uchel-ei-risg am dros 20 mlynedd yn ogystal â bod yn Gadeirydd Gweithredol ELWa, cyn-Gyngor Cenedlaethol Cymru dros Addysg a Hyfforddiant.

Gary Griffiths

Gary Griffiths yw Rheolwr Strategol Rhaglenni Prentisiaeth Airbus UK. Mae e’n eistedd ar nifer o gyrff cynghori gan gynnwys Grŵp Sgiliau’r Sector Awyrofod, Fforwm Datblygiad Rhanbarthol De-Orllewin Lloegr, Gweithgor Prentisiaeth Peirianneg Uwch y DU a grŵp cynghori SEMTA ar gyfer Fframwaith Credydau a Chymwysterau Cymru. Fe sy’n cynrychioli Airbus UK ar Brosiect Sgiliau Rhyngwladol Strategol Airbus a Rhaglen Cymhwysedd Rhyngddiwylliannol Airbus. Mae e’n dod â gwybodaeth, arbenigedd a phrofiad o’r sector a’r diwydiant dysgu seiliedig ar waith i’r Panel Adolygu Annibynnol.

Dydd Mawrth 11 Rhagfyr 2007

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan